15

10.2010

Binigbig ni Bokal Manuel Victor “Mannix” R. Ortega, Jr. ti kinagaget dagiti empleado ti Gobierno Probinsial ti La Union nga idadauluan ti amana a ni Gob. Manuel C. Ortega. Idi pangrikep a seremonia ti dua nga aldaw a Basic Customer Service Skills Training a naangay idi Setiembre 6-7, 2010 iti Diego Silang Hall ti Kapitolio ti La Union, Siudad ti San Fernando, pinadayawan ti Bokal ti dedikasyon dagiti empleyado ti Kapitolyo.

Kinuna ni Bokal Ortega, presidente ti Liga ng mga Barangay ti La Union, nga amin a sao ken aramidda tunggal sumangoda kadagiti kliente da ket pakarukodan ti kredibilidad ti Gobierno Probinsial nga ibagianda. Isu a kasapulan nga agsursuroda iti husto ken nasayaat a pannakilangen kadagiti serbianda a tattao.

“Rumbeng laeng nga itedtayo ti kasayaatan a serbisiotayo ta dayta ti puon ken gapu ti kaaddatayo iti gobierno. Isuda ti masurot a kas ari ken reyna maipapan iti panagserbi iti publiko, kas iti panangited ni PNOY iti importansia kadagiti Pilipino nga isuda ti bossna,” kinuna pay ti Bokal nga agdama nga Executive Vice President ti nasional a Liga ng mga Barangay.
Induluan ti Civil Service Commission – La Union Field Office iti panangipangulo ni Dr. Viloeta N. Mendoza, ken ti Human Resource Management Office nga ipanguloan met ni Ms. Ma. Theresa F. Gonzalez ti nasao a training.
Naidisenio daytoy duwa nga aldaw a panagsanay para kadagiti frontline service providers tapno maipaganetget kadakuada ti pudno a kaipapanan ti panagserbi. Nagpaay a resource speaker da Mrs. Cecilia R. Bareng, hepe ti Management Services Division ken Mrs. Lyrma C. Oalin, hepe ti Human Resource Management Division ti Civil Service Commission-Region I.